Nina abakaNdaba omuhle kakhulu uNdaba ngiyameba ngimuke naye , ngimbuke kuze kwehle nezinyembezi kube sengathi ngibuka isihlahla soMdlebe! UGawu bazawuliluma bazawuliphimisa bakhumbul’amaGawu abebesi! UZulu lizayo khwezan’abantwana ngabadala bodwa abayozibalekela ! IGwija likaMdlaka ligwegwe lijiyeze abasini bengoma!! Enhla nasezansi ngiyayibingelela yonke iNgabade kungumhla weshumi nesithupha kuEphreli {Mbasa} onyakeni ka 2023. Ngethemba basaphila abeZulu eliphezulu , cha thina sisaphila eMantungweni.
UNgibonisele::
Nina beSilo lo muthi eniwubona esithombeni kuthiwa uNgibonisele ngesiZulu, ngesiLungu kuthiwa i-Acalypha glandulifolia . IGobongo likaThwasa noma eleSangoma lisuke lingaphelele uma ungekho uNgibonisele. UMbhemiso kaThwasa noma oweSangoma usuke ungaphelele uma ungekho uNgibonisele. Njengoba negama lizisho lona, le Nduku yenza into ebikade ifihlakele ivele obala. Le Nduku ingena eMibhemisweni yokubhula yoThwasa neZangoma , iqaqa ikhanda leSangoma noma elikaThwasa libe bukhali lisheshe ukuthola umkhondo. Iyangena naseGobongweni likaThwasa noma eleSangoma , sishaya emhlolweni iSangoma esidle leNduku, asigeji, sibukhali kabi. Le Nduku iyangena naseGobongweni lokuhlambulula iDlozi, yenza iDlozi licace, lisondele kumuntu futhi licacise namaphupho. Le Nduku kahle -hle iyabonisa, umuntu phaqa uma ephalaze ngayo uzibona zonke izitha zakhe ngephupho. Iyangena nakwezenhlanhla, iyabonisa lapho imali ingakhona, ikhanyisa nezindlela. Iyangena kwezemisebenzi , ezokufesa, iyaphalaza iyageza iyagquma. Isuke ithakwe nezinye iziNduku. Lobu uBulawu obuhle beDlozi obenza umuntu athandwe yiDlozi , buqhathwa neNingizimu , uVumakubangoma omhlophe, iNhlanhlemhlophe kanye nezinye iziNduku. Le Nduku iyangena kwiZikhafulo zamaSoka. Iyangena naseMabuthweni athunywa ukuyolanda iziKweletu. AmaSoka ayikhonze kabi le Nduku , ayayithaka eNdukwini yawo emhlophe ebandakanya iNhlanhlemhlophe, uMusa , uFoshela kanye nezinye iziNduku ezimhlophe . UNgibonisele uyangena naseZibungeni zeBhizinisi , uyadonsa , udonsa amaKhastama uwalethe eBhizinisini. Kusebenza impande , ethi kayifane nekaKhalothi. Lona wumuthi omuhle kakhulu othandwa abantu beDlozi , amaSoka, oSomabhizinisi njalo njalo .
Khumu!!
Ngena kuYou Tube wethu osihloko sithi “Kholo Khumalo TV” uthole olunye futhi ulwazi ngaMakhathakhatha.. Niphile nina bakaKhalima akhande njengeZulu lona limakhalima limandindizela!!
UNgibonisele
