UMhlonga kaNkotshana Thebe wayebuye aziwe ngelikaMkhithika Thebe. Le nsizwa yayiqhawe elikhulu lenkosi u-Mzilikazi kaMashobana.  UMkhithika Thebe wabamba elikhulu iqhaza ekwakhiweni kwesizwe sikaMthwakazi okuyisizwe esakhiwa yiNkosi uMzilikazi kaMashobana Khumalo. Nansiya isizwe eNingizimu yezwe laseZimbabwe.  UMhlonga wayesebuthweni elalaziwa ngokuthi ‘Amnyama angenkomo’ Leli butho laliholwa insizwa yaseMangweni uGundanekumitha kaNdlovu waseMangweni. Laba bantu bakwaThebe engixoxa ngabo kusengabantu bakwaSithebe , uSithebe wayengowakwaNdwandwe. Kukhona abanye oThebe abatholakala koNorth West , labo bantu bakwaThebe ababona abakwaNdwandwe, bangabaTswana. UMhlonga noma ngithi uMkhithika wahlabana kakhulu  ngenkathi abakwaKhumalo behlaselwa ngabakwaMalandela (Zulu).Wagonisa amathumbu amabutho amaningi eLembe ikakhulukazi aweZimpohlo . Kodwa kuleyo mpi uMhlonga wagcina esengomunye wezinkubela. Kukuleyo mpi lapho athola khona igama elithi unguMkhithika nokuyigama alethiwa iNkosi uMzilikazi ngoba kuthiwa wayevele akhithike nje esitheni . Wayengisabi ukusiqonda ngqo.

UMkhithika ubuye  akhumbuleke kakhulu ngenkathi kweduke inkosi uMzilikazi Kanti futhi kuthiwa wayengomunye weZikhulu

ezazingahambisani nokubekwa koMntwana uNkulumana esihlalweni sobukhosi ngenkathi kweseduke iNkosi uMzilikazi. INkosi uMzilikazi yeduka okweminyaka emithathu , kwaze kwabekwa uMntwana uNkulumana ngoba sekuphele amathemba kubantu, sebeqala ukungabaza ukuthi iNkosi yabe

isaphila . IZikhulu zoMbuso kaMthwakazi zagcina zithathe isinqumo sokuthi kuqokwe ithimba elalizophuma inqina yokuyocinga iNkosi uMzilikazi . Kuthiwa zaqoka uMkhithika ukuba kube nguyena owayezohola lelo thimba. Kuthiwa waphuma uMkhithika nethimba lakhe baphelekezelwa ibutho laManyama angenkomo. Ngempela yatholakala iNkosi itholakala endaweni eseyaziwa manje ngokithi yiVictoria Falls nokuyindawo ehlezi inenkungu, futhi likhiza . Kuthiwa iNkosi uMzilikazi yathukuthela yathelwa ngamanzi uma izwa ngokubekwa koMntwana uNkulumana esihlalweni. Yakhipha umyalelo owawuthi kubulawe zonke iziNduna ezazithinteka ekubekweni koMntwana uNkulumana. Kulezo ziNduna ezabulawa singabala kuzo uGundanekumitha, uNyathela kaKhanyi, uSomabulane ka Dlodlo kanye nezinye. Abanye ababulawa oNdlunkulu oLomawaka Nxumalo unina kaNkulumana kanye noFulatha Nxumalo unina kaLobhengula. Intaba ezabulawelwa kuyo namuhla yaziwa ngokuthi iNtabayezinduna noma iNtabazinduna. Kukhona umlando othi akukho muntu owabulawa eNtabazinduna kepha kwathethwa icala lokubekwa koMntwana uNkulumana . Lowo mlando uqhubeka uthi izinduna oGundanekumitha kanye nabanye badingiselwa ezindaweni ezikude.

(Izihasho zikaMthithika Thebe)

We Mbamba majozi

Joz’eliginya ngisho nonwele

Lomaqangela wezihlangu

Mthika odl’eminy’imithika

Wen’ontam’eyehlul’abagongodi

Bagiye bath’usele, bath’ufile kanti

Yisikhumb’asigoqeki

Sigoqwa ngamadod’alishumi

Engeshumi phinde angesigoqe

Ndatsh’oxotshela futhi

Ngonyam’emanxeb’ayizidada

Sil’esikhalima kuqhaqhazel’amadoda

Sil’esathikazwa ngamathikana kaDingane

Sil’esilawula kanye kube kanye

Silo sikamalayitha kwaBulawayo

Khithi ! Mkhithika awele

Kant’iNkosi wayiweza njani ngomhlana

Mhlan’uMkhuz’ ufulathelene

Haaa !Nkunz’eyanqob’eziny’emazibukweni

Khithi! Mkhithika

Khithi ! Kukhithik’amadod’egqizile

Khithi ! Amadod’abeseginqile

Khithi ! Njengamahlamv’ebusika

Khithi!  Amadod’eqiwe yitwetwe

Khithi! -Kithi! Kukhithik’imikhonto njengunungu

Mvus’omnyama

Wen’owavusela abantu ukuhlatshwa

Kungesuye uMzilikazi Wawungedwetshwe

Phumani ngithi phumani bo

Tshiyan’amadumb’enu

Kukhulu kuyeza kuyanyelela

UShaka kashayeki ngob’enjani

Bud’abuphangwa

Labasemazwaneni bazowuthol’umkhiwane bawukhe

Hawu wadl’umfokaKolontshi bo

Lwadl’usiba lugojela

Lon’olwagojela amadoda, amadojeyana lamadodana

Lon’olwagojel’inyongo yesilo sabhek’itheku

We Mkhithika

Wen’owahleng’iNkosi yoHlanga

Wen’owahleng’iNkosi kuMkhuze

Amachalaha kamfokaSenzangakhon’esehlosil’

ahloba

Wayihleng’eMahalihali

Wayihlenga eGwembeni lwempunza

Wayihlenga ngitsho lesicoco

Haa! Nkunz’eyanqob’eziny’emazibukweni

Phendu wazogadla

Mama ngadla!

Ngadla ntombi kababa

Ndatsh’oxotshela futhi

Izwe gwadlana ndini

Ngith’azeluke kazaluke azeluke bo!

Ibinda !

(Izithakazelo zakwaThebe)

Thebe

Bhoqo

Mkhithika

Dliso

Jongilanga

Nhlunu kayipheli kuphela eyamadoda

Mbamba majozi

Dlembe oludla ukhula

Guqa elidla amankonyane

Mahlenga ngoba bahlenga inkosi yohlanga

Isiqholozane esimehlo abomvu

Isilo sikaMalayitha kwaBulawayo

Klobe uKholo Khumalo INxazonke