Incazelo ngezitho zenkomo uma kuhlatshiwe (ezangaphakathi)
-Isitho
*Incazelo
-Isisu
*Isitho esigcina amathumbu nokunye nje okwangaphakathi. Sicotshelwa ebubendeni obudliwa ikakhulukazi ngabesilisa.
-Amathumbu
* Ehlukaniswa kuthiwe kukhona amakhulu namancane, amhlophe namnyama. Kwamancane amhlophe kukhishwa ilulu. Amathumbu adliwa ngoMame
-Ilulu
*Ithumbu elisikwa kwamancane, amhlophe ngasekugcineni. Ilulu lide cishe lingamaSentimitha angamashumi amabili. Lidliwa indoda endala ,uYise woMnumzane ohlabile.
-Iphaphu
*lisesifubeni , likhishwa kanye nenhliziyo . Iphaphu lidliwa ngabafana
-Isibindi
*Isibindi siseduze kwephaphu. Sikhulu , sehluka ngobukhulu benkomo. Ngaphambi kokuba sidliwe kuye kusikelwe uSokhaya umbengo wokosa, bese esisele sidliwe ngumkhaya, ikakhulukazi amakhosikazi. Endulo isibindi senkabi noma esenkunzi sasidliwa yi-Ngonyama esuke ibusa ngaleso sikhathi, isidle size siphele nya.
-Inhliziyo
* Isikwa ihlukaniswe ephashini . Ihamba nephaphu uma isidliwa ngabafana.
-Inyongo
* Isitho esixhumene nesibindi. Inyongo kayidliwa . Iyafuthwa bese kuconsiselwa ezinyaweni nangaphandle kwezandla nasekhanda lalowo ohlatshiswayo. Abanye bayaye bayichome ekhanda , ikakhulukazi amathwasa noma abangoma.
-Uvalo
*Ithanjana elincane elingezansi kwesifuba elihamba kanye nesifuba
-Uluntu(untu)
* Isitho senkomo esiluthwethwesi okuyisona semboze amathumbu esiswini, kodwa kuthi lapho inkomo isihlinzwa sihambe nomhlubulo. Untu ludliwa ngoMame kanye nomhlubulo. Luhle futhi ekosiweni.
-Izinso
*Kuthiwa ngesilungu amaKidneys , zakhiwe okukaBhontshisi kodwa zona zinkulu kunawo. Ziphahle umgogodla, ngezansi koluntu. Izinso zidliwa nguMnumzane, noma ngumuntu owaziswa nguMnumzane.
-Itwani
* Itwani lixhumene namathumbu kodwa akulona ithumbu. Inyama ebumbene , ehlangene, okuthi uma iqhekezwa itholakale inamagunjana aqukethe ubulongwe. Itwani lidliwa ngamakhosikazi
-Iziphapha
* Inyama esezinhlangothini evimbela ububende. Icotshelwa ebubendeni lapho inkomo ihlatshiwe . Ububende budliwa ngabantu besilisa.
-Isinye
* Isikhwama samanzi aphuma ezinsweni achithelwa ngaphandle.
-Usinyaka
*Usinyaka ususwa oswini. Yithumbu elikhulu elingasesekugcineni elilandelwa ngupopopo. Udliwa ngamakhosikazi
-Usu
* Usu lususwa ngaphakathi kade luxhumene nephaphu nosinyaka. Amathumbu aphakathi kosu nosinyaka . Usu yithumbu elikhulu elisongene laba yinkatha. Lusathawula . Lunobulongwe ngaphakathi obukhishwayo.
Ludliwa ngamakhosikazi
-Upopopo
*Uxhumene nosinyaka ngaphakathi, kuthi ngasekugcineni kwawo uxhane nomtshazo
Udliwa ngoMame
-Umtshazo
*Uxhumene nopopopo. Wona-ke uze uphumele ngaphandle. Inyama emhlophe engangengalo yonke
Udliwa ngoMame. Ucotshelwa nasebubendeni.
*Uxhumene nopopopo
-Umvimba(noma Imvimba , noma uvimba)
* Umtshazo uma ufakwe amaqatha amanoni wavalwa waboshwa nxa zombili wase ufana nevosi. Ube usuphekwa -ke lo mvimba noma uthothombaliswe emlilweni. Udliwa ngabafana
-Inazo(inanzi)
* Ixhumene netwani. Ingumbhobho omude ocishe ngamaSentimitha angama-30. Phakathi kukhona nobulongwe obumanzi okuthi nxa umuntu ebukhipha muphume buthi tshu. Inazo idliwa ngoMame kanye netwani
-Ingwaqo
* Ingenhla kwephaphu. Umuntu unqamula iphaphu bese enqamula umminzo , kuthi ngenhla-ke kube yingwaqo. Ingangezandla ezimbili, uisicubu esisodwa. Imhlophe . Abanye kabayehlukanisi noqhoqhoqho. Iba yintshontsho labamnumzane
-Ubende
* Linamathela oswini. Luyisibeba nje esibanzi cishe ngangesandla uma inkomo incane. Uma inkulu luba ngaphezulu. Kuthiwa futhi ngamanyikwe.
Ludliwa ngabafana. (Kwesulwa ngalo ediphini uma inkomo ifile noma ihlatshiwe)
-Ubhedu
* Lokhu kushiwo iphaphu nenhliziyo. Le nyama idliwa ngabafana entabeni, ilwelwe . Le nyama ibizwa futhi ngokuthi ungungu
-Imvali
* Ixhumene nosu. Iyisakana , isikwa isuswe eswini. Phakathi kukhona umswani othambile. Kuhlala amatshe phakathi, uhlalu. Kuthiwa imvali ngoba idliwa ngumfana ovala esangweni, owelusa izinkomo.
-Umhlehlo
* Lithwethwesi lamafutha elinamathele oswini. Uqotshelwa ebubendeni kanti futhi udliwa ngamakhosikazi
-Umthala
* Inyama eyisicubu, eba samvinqo oswini, engafani nosu ukwakheka kwayo nasemlonyeni. Ikhethelwa abadala ekhaya, bavamise ukuyidla isipholile.
-Impundu
* Isikwa esibindini ngoba usuke ikade ixhumene naso. Idliwa izalukazi ,kuthiwa uma idliwa ngabasebasha baba izikhohlwa.
-Umminzo
* Umminzo nguqhoqhoqho. Kuthi lapho kususwa iphaphu kusale umminzo, kuthi ngenhla kube yi-ngwaqo. Njengengwaqo , nawo umminzo untshontshelwa abanumzane abakade behlinza
#Khumu!
